Esta cuestión xurdiu un día no parque de Xinzo mentres xogabamos cos nosos curmáns e irmáns pequenos gozando dunha agradable tarde. Nun momento dado, mentres eles xogaban no tobogán, fixámonos nas distintas velocidades no descenso duns e outros, e chamounos a atención que mesmo un mesmo neno, cando baixaba en distintas posicións, non empregaba sempre o mesmo tempo. Esta situación levounos a un debate sobre o que explicara o profesor de Física e Química sobre as forzas de rozamento e induciunos a pensar que unha das leis das forzas de rozamento (“a cantidade de superficie non afecta á forza de rozamento”) podería non ser correcta. Así que o consultamos co noso profesor e el mesmo propúxonos a elaboración deste traballo. Eliximos esta cuestión para afirmar ou desmentir esa lei.